Фудбал

Платини призна: Го наместивме финалето на Светското првенство во 1998 година

18. мај 2018 - 15:46 | М.Д.

Мишел Платини, поранешниот претседател на УЕФА кој беше суспендиран од фудбалот поради корупција, тврди дека Светското првенство од 1998 година било наместено за во финалето да се сретнат Бразил и Франција.

Франција пред 20 години на свој терен го освои светското злато со победа од 3:0 во финалето против Бразил, а Платини тврди дека мали трикови при ждрепката обезбедиле овие две светски фудбалски сили да се сретнат дури во финалето.

„Кога го правевме календарот, се послуживме со трикови. Само ние (Франција) и Бразил моравме да завршиме први во група и не можевме да се сретнеме пред финалето. Тоа на крај и се случи“, изјави Платини.

Бразил воочи турнирот беше прва екипа во светот и беше дел од групата А, додека Франција како домаќин играше во групата Ц.

Платини, кој беше дел од организацискиот одбор за Светското првенство во Франција, тврди дека тогаш на сите им било сон во големото финале да играат Франција и Бразил.

„Не се досадувавме шест години со организацијата за СП за на крај да не се послужиме со трикови. Кога играте дома, сакате да уживате во некои работи. Мислите дека останатите домаќини не го правеа истото? Финалето со Бразил беше сон на сите нас“, вели Платини.

Коментирај