Поранешниот фудбалер и претседател на УЕФА, Мишел Платини, има поинаков и чуден избор за освојувач на овогодинешната Златна топка. Тој даде поддршка за неговиот сонародник Рафаел Варан, кој годинава ги освои двата најголеми трофеи во клупскиот и репрезентативниот фудбал.
По една цела деценија изгледа дека Златната топка ќе му припадне на некој друг играч, кој не се вика Лионел Меси или Кристијано Роналдо.
Мишел Платини е голем фан на Рафаел Варан и смета дека тој е единствениот логичен освојувач на Златната топка оваа година. Според неговата логика, не е далеку од вистината – Варан е единствениот играч кој беше дел од шампионскиот тим на Реал Мадрид кој ја освои Лигата на шампините и репрезентацијата на Франција која го освои Светското првенство во Русија.
„Секогаш ќе пости дебатата Роналдо-Меси, но оваа година само еден играч ги освои двата најважни трофеи – Рафаел Варан. Покрај титулите, тој е одличен играч и ако имав шанса ќе гласав за него. Резултатите се единствената објективна работа, сите останати работи се субјективни“, вели Платини.
Помеѓу кандидатите за наградата има неколку француски фудбалери, но обложувалниците и понатаму го сметаат Лука Модриќ за фаворит за освојување на Златната топка. Тој беше дел од составот на Реал Мадрид кој го освои финалето во ЛШ и ја однесе Хрватска до првото финале на големите натпреварувања, иако таму изгуби од Франција.
„Може да имаме различни мислења за Гризман, Мбапе, Жиру, Модриќ...но единствениот кој успеа да освои сѐ оваа година е Варан. Да не заборавиме дека во 2006 година Златната топка ја освои Фабио Канаваро, кој исто така беше одбранбен играч“, додава Платини.
Оваа година се одбележуваат 10 години откако Кристијано Роналдо за првпат ја освои Златната топка, а оттогаш секоја година наградата ја земаа тој или Лионел Меси.