Пливачко злато за Ирска: Вифен го собори олимпискиот рекорд на 800 метри

Ирецот Даниел Вифен ја потврди доминацијата на долги патеки, па покрај титулата светски првак од Доха, со нов олимписки рекорд го додаде и олимпиското злато на ЛОИ во Париз на 800 метри.

Момчето од Лохборо исплива брилијантно со време од 7:38.19 минути, победувајќи ги Американецот Боби Финк (7:38.75 - златен од Токио 2021) и Италијанецот Грегорио Палтриниери (7:39.38) и ѝ го донесе на Ирска првото олимписко злато во пливање во машка конкуренција и прво по Игрите во Атланта 1996. Ќе видиме дали сето тоа ќе може да го повтори на 1.500 метри, бидејќи во Доха стана светски првак и во таа дисциплина.

Одличната Австралијка Кејли МекКион го освои златниот медал на 100 метри грбно со нов олимписки рекорд од 57,33 секунди. Таа ги надмина светската рекордерка Реган Смит (57,66) и Кетрин Беркоф (57,98), двете од САД.

Третото финале на вечерта беше четирикратната штафета на 200 метри слободно кај мажите со 9 екипи, а Велика Британија славеше со време од 6:59,43 минути бранејќи го златото од Токио. Трката беше повеќе од возбудлива, Британците водеа од втората смена пред Американците, а потоа Австралијците. Она што го направија Џејмс Гај, Том Дин и Метју Ричардс беше позлатено во последната измена од Данкан Скот. 

Среброто ѝ припадна на штафетата на САД (Хобсон, Фостер, Киблер, Смит - 7:01.98), а бронзата ја освои Австралија (Џулиани, Соутам, Винингтон, Нил - 7:01.98).