Еден од продуцентите на популарната анимирана ТВ-серија „The Simpsons“ даде одговори на дел од најголемите мистерии поврзани со анимираното семејство, како на пример зошто се жолти и како ги добиле имињата.
Мајк Рис работи на култната серија од почетокот на нејзиното емитување во 1989 година, а сега ја објави книгата „Springfield Confidential: Jokes, Secrets, and Outright Lies from a Lifetime Writing for The Simpsons“ во која дава одговори на најчесто поставуваните прашања од фановите.
Зошто се жолти?
Рис вели дека препознатливата жолта боја на ликовите дошла сосема спонтано. Бојата за оригиналните ликови на Мет Гронинг ја нашол поранешниот аниматор на шоуто, а Рис објаснува дека тоа го направил поради бизарните фризури на децата.
„Барт, Лиса и Меги воопшто немаат коса, односно немаат линија што ја одвојува косата од лицето. Затоа аниматорите ја избраа жолтата боја како најслична и до боја на коса и до боја на кожа“, вели Рис во книгата.
Зошто името на семејството се појавува зад облаци во најавната шпица?
Фановите на серијата добро ја знаат најавната шпица, но многумина ќе се изненадат зошто е баш така направена. Рис објаснува дека кога прв пат ја емитувале серијата, гледачите прво имале можност да го видат првиот дел од зборот - „The Simps“ – пред да им биде откриен остатокот.
„Simps е кратенка за simpletons, глупави луѓе, како оние што ќе ги гледате во серијата“, објаснува Рис.
Како ги добиле имињата?
Хомер и Марџ ги добиле имињата по вистински луѓе – авторот на серијата Мет Гронинг ги употребил имињата на неговите родители како инспирација за ТВ-двојката. Лиса и Меги ги добиле имињата по неговите сестри, а името на Барт е анаграм од зборот brat (разгалено детиште).
