Дури 32 години после последниот англиски геј фудбалер, младиот Џејк Даниелс од Блекпул реши јавно да проговори и да ја открие тајната за неговата сексуална ориентација.
Кога интервјуто на црномурниот Џастин Фушану на 22 октомври 1990 година излезе во таблоидот The Sun овој лондончанец стана првиот англиски фудбалер кој јавно призна дека е геј. На наредниот се чекаше до сега, дури 32 години подоцна, во мај 2022 година.
„Им кажав на мајка ми и на сестра ми. Тие ми рекоа: 'Па да, веќе знаевме'. Ден после тоа игравме со Акрингтон и постигнав 4 голови, што само покажува колкава тежина ми падна од рамена и колку само ми се олесни“, раскажува Џејк за Sky Sports.
Даниелс вели и дека неговите соиграчи од Блекпул му дале голема поддршка, особено капитенот Крис Маквел, велшки голман. Никој не го осудил. За да проговори јавно му помогнале и примерите на Австралиецот Џош Кавало, на британскиот пливач Том Дејли кој освои злато на ЛОИ во Токио, и на тренерот на Тетфорд Таун, Мет Мортон.
„Сега е вистинското време да се направи ова. Чувствувам дека сум подготвен да им ја раскажам на луѓето мојата приказна. Сакам луѓето да го запознаат вистинскиот јас. Долго време мислев како да го направам ова, кога сакам да го направам. Знам дека е време. Подготвен сум да бидам јас, да бидам слободен и да бидам сигурен со тоа“.
Има само 17 години и скоро потпиша професионален договор. Игра како напаѓач, а сезонава дебитираше за првиот тим во Чемпионшип на 7 мај против Питербороу Јунајтед откако претходно играјќи за младинците постигна 40 голови.
„Не можам точно да одредам временска рамка, но веројатно имав 5 или 6 години кога знаев дека сум геј. Така да долго време живеев во лага. На тие години не размислувате баш на тоа дека фудбалот и да се биде геј не може да се поврзат. Си мислите дека еден ден кога ќе пораснете ќе си фатите девојка и ќе се промените, и сѐ ќе биде во ред. Но, како што растете сфаќате дека не можете да се промените. Тоа не функционира така“.
„Имав девојки во минатото, се обидував сите мои другари да ги убедам дека сум хетеро, но тоа беше само едно големо прикривање. На училиште многумина ме прашуваа: 'Сигурен си дека не си геј?', а јас им одговарав: 'Не, не сум'“.
Јавното излегување на Даниелс го поздравија и Хари Кејн, Гари Невил и поранешната легенда на англискиот фудбал Гари Линекер.
Блекпул сезонава во втората англиска лига заврши на 16. место
