Нешто помалку од две илјади гледачи, кои ќе присуствуваат на овогодинешното финале на англискиот Лига куп меѓу Манчестер Јунајтед и Њукасл Јунајтед на 26 февруари на стадионот Вембли во Лондон, ќе имаат на располагање места за стоење, соопшти Англиската фудбалска лига (EFL).
Стадионот Вембли може да прими 90.000 гледачи, а за овој натпревар, по 867 места зад двата гола ќе бидат претворени во т.н. „безбедни стоечки зони“. Местата ќе бидат достапни за навивачите на двата клуба.
„Во овие зони на навивачите ќе им биде дозволено да стојат за време на натпреварот, на места каде што преградите или оградите ќе ги спречат да паднат нанапред. На сите останати делови од стадионот навивачите мора да седат“, соопшти EFL.
Одлуката доаѓа откако клубови како Кардиф Сити, Челси, Манчестер Сити, Манчестер Јунајтед и Тотенхем им понудија лиценцирани места за стоење на домашните и гостинските навивачи на пробна основа.
Пред тој експеримент, сите стадиони на клубови кои се натпреваруваа во највисокото ниво на англискиот фудбал повеќе од 30 години беа само со места за седење. Причина за ваквата одлука беше трагедијата на стадионот Хилсборо во 1989 година, кога 97 навивачи на Ливерпул ги загубија животите во преполниот дел од трибината кој беше опкружен со железна ограда.
Во јули минатата година, британската влада соопшти дека сè повеќе британски клубови ќе почнат да воведуваат безбедни места за стоење на своите стадиони.
