Македонски репрезентативец Енис Барди си замина од Леванте и потпиша тригодишен договор со актуелниот шампион на Турција.
Заврши авантурата на Барди во шпанска Ла Лига. После цели 5 сезони играње во една од топ 3 европските лиги, Барди се одлучи дека е време да го напушти Леванте, особено што тимот минатата сезона испадна од шпанската елита и во новава сезона игра во Сегунда.
Барди завчера ги мина медицинците прегледи во клубот од Трабзон, по што синоќа стави потпис на тригодишниот договор кој ќе му носи 1,5 милион евра по сезона. Тој во новиот клуб ќе го носи дресот со бројот 29.
Во Леванте дојде летото 2017 година, веднаш после настапот со Македонија У21 на младинското ЕУРО во Полска. Тогаш клубот од Влаенсија му плати 1,5 милион евра на унгарски Ујпешт каде Барди одигра три одлични сезони. Играше и во шведски Преспа Бирлик, клубот на македонските турски иселеници од Преспа, кратко беше дел од академијата на Брондби, а во родното Скопје играше во младинските категории на Албарса.
Со Трабзонспор ќе се обиде да ја одбрани титулата во турската Супер Лиг, а ќе се обиде и да избори место во групната фаза од Лигата на шампионите. Трабзонспор во квалификацискиот плеј-оф игра против дански Копенхаген. 27-годишниот Барди никогаш во кариерата не играл во Лигата на шампионите. Во новиот клуб ќе биде соиграч со прославениот Словак Марек Хамшик.
За Леванте одигра вкупно 162 натпревара во сите натпреварувања и постигна 24 голови. За Македонија досега има 48 натпревари и 11 голови.
