Не се работи за промена, најстариот активен македонски весник и натаму ќе го има своето препознатливо лого, но со мала измена: сега е приспособено на модерното време.
Досега весникот го користеше скенираното лого од првиот број на дневниот весник, објавен на 29 октомври 1944 година. Долго време оригиналното лого не се наоѓаше на насловната страница, а беше повторно воведено во 2018 година.
„Од големо значење е што сега насловните страници на Нова Македонија ќе бидат испишани со ново автентично лого, креирано специјално за весникот“, пишува весникот во денешниот роденденски број.
Логото на весникот е модернизирано од графичкиот дизајнер Ласко Џуровски, кој претходно ги изработи фонтовите Рацин и Конески.
„Новото лого на Нова Македонија е, всушност, редизајн и приспособување на постојното лого на современите графички стандарди. Работејќи на овој редизајн, настојував, онолку колку што е можно, да ги задржам основните визуелни карактеристики на постојното лого. При изработката не е користен фонт, туку нацртав оригинални графички форми базирани на постојните, нормално, со адекватна корекција на пропорциите и изгледот на буквите. Ме инспирира оригиналноста на типографското решение на постојното лого, воочив некои неправилности, кои, според моето видување на типографијата, сметав дека треба да се променат. Решив да се обидам да го направам тоа од љубопитство, да видам како би изгледало, но, како што многупати се случува, тоа некако ме повлече, ме заинтригира и не ми даваше мир додека не го завршив“, вели Џуровски во изјава за Нова Македонија.
„Ми беше чест и задоволство, по повод 77. роденден на првиот македонски дневен весник Нова Македонија да го редизајнирам неговото лого. Честит роденден, ви пожелувам уште многу години да бидете педантен хроничар на животот во нашата единствена Република Македонија“, напиша тој на Facebook.