После точно една година и пет месеци откако ја размрдаа домашната музичка сцена со синглот „Можам без тебе“, рок-бендот „Mayday“ конечно се појави во второ видео, овој пат за новата нумера „Ти моја“.
И новата песна е целосно нивно дело, бидејќи како што самите претходно најавија „замислата е да снимаме само авторски песни“.
По повод новиот видеозапис поразговаравме со бас гитаристот Никола Младеновски, а тој ни откри и дека приказната која се крие позади оваа песна е всушност инспирирана од вистински настан.
„Автор на текстот од новата песна е нашиот пејач. Приказната што се крие позади неа е всушност љубовна драма која што ја има доживеано самиот тој. Во кратки црти, може да се каже дека му се допаѓала девојка која исто така и него му имала фрлено око, но на крај завршила со друг“, Никола ја раскажува идејата за текстот.
Зошто толку долго се чекаше на втор видеозапис, Младеновски вели:
„Аудиозаписот беше сниман уште во јануари, проблемот всушност беше со видеозаписот. Штом требаше да почнеме да се организираме за снимање, своевремено корона фатија поголемиот дел од бендот со што се пролонгираше снимањето на спотот. Откако помина сето тоа се појави проблем со усогласувањето на термините за снимање на целата екипа. Јас лично имав чувство како виша сила да нѐ спречуваше сето тоа да го комплетираме, бидејќи сѐ што можеше да се случи за да биде спречено снимањето - се случи. Но, фала му на Бога сето тоа е сега позади нас“.
„Mayday“ веќе работат и на третата по ред песна, за која се надеваме нема да чекаме уште година и пол.
„Веќе почнавме да работиме на третата песна. Во иднина сакаме да воспоставиме некој баланс, да се одвиваат работите во нормално темпо, да има константност“, заврши Никола во изјава за Kajgana.com.
Фото: Mayday
