Голема трагедија во Русија. Тројца Руси загинаа откако се урна хеликоптерот што го пилотираше поранешниот петкратен јуниорски светски шампион во биатлон.
Остатоците од хеликоптерот во кој се наоѓаше поранешниот светски шампион беа пронајдени во Камчатка на 17 јули. Пронајдени се три мртви лица, а сега руските новинари донесоа застрашувачки факти за несреќата.
Игор Малиновски почина на 16 јули заедно со Зоја Кајгородова и Сергеј Колесњак. Следниот ден, во близина на превојот Семјачков, на 13 километри од вулканот Узон, беа откриени коски на три лица. Руските и светските медиуми пишуваат дека мртвите тела на трите жртви биле искасапени и изедени од мечки.
Според вестите на Channel Five во Русија, Министерството за вонредни ситуации ги даде првите информации за трагедијата. Несреќата се случила за време на деветдневна обиколка на областа во услови кои не биле погодни за летање. Хеликоптерот требало да слета во соседното село Милково во 7 часот по локално време. Меѓутоа, комуникациите на хеликоптерот престанале, по што почнала потрага.
Малиновски беше одличен биатлонец и сакаше да биде пилот
Локалните медиуми забележуваат дека хеликоптерот бил во сопственост на компанијата Vzlyot, чиј сопственик е таткото на Игор, Владимир Малиновски. Овој 25-годишник бил голем вљубеник во авијацијата и во него се судриле две желби. Од една страна, тој се обиде да ја продолжи кариерата како биатлонец, но неговата главна цел беше да стане пилот.
Студирал на Техничкото училиште за цивилно воздухопловство. Пред три месеци ја добил дозволата за пилот на Mi-8, а sports.ru наведува дека ја продал спортската опрема затоа што сакал да биде пилот.
Daily Mail пишува дека заминувањето на Малиновски го оплакува руската и светската биатлонска заедница. Јуриј Камински, главен тренер на руската машка репрезентација во биатлон, за спортската телевизија Match TV изјави: „На сите ни е многу жал. Долго време беше дел од нашиот машки тим и ветуваше многу. Тој беше прекрасен човек и одличен спортист. Колку што знам, се двоумеше дали да го напушти биатлонот или не, да се концентрира само на летање или не. Беше толку млад“.
„IBU и целото биатлонско семејство тагуваат за загубата на Игор Малиновски, петкратниот јуниорски светски шампион и натпреварувач во Светскиот куп. Секогаш ќе го паметиме како голем биатлонец. Изразуваме сочувство до неговото семејство“, рече претседателот на IBU, О. Далин.