За непристојното однесување на Копа Америка казна доби и бразилскиот голгетер Габриел Жезус со тоа што неговата е за еден месец помала од онаа на Меси.
Габриел Жезус нема да може да настапува за репрезентацијата на Бразил во наредните два месеца, одлучи КОНМЕБОЛ и ќе ги пропушти септемвриските пријателски против Колумбија и Перу во САД. Јужноамериканската конфедерација го казни поради испадот за време на финалето од Копа Америка каде неговиот Бразил го совлада Перу, а играчот го постигна голот за 2:1.
Напаѓачот во 70-тата минута го фаулираше Карлос Самбрано и заработи исклучување поради втор жолт картон по што бурно реагираше на одлуката на Чилеанецот Роберто Тобар. Одбиваше да го напушти теренот, се буткаше со Перуанците, му викаше на судијата, гестикулираше кон ВАР собата, а продолжи да негодува дури и откако го напушти теренот. Жезус ќе мора да плати и 30 илјади долари.
Претходно Лео Меси доби тримесечна суспензија плус 50 илјади долари казна за коментарите што ги даде кон КОНМЕБОЛ дека Бразил добивал помош на патот кон титулата.
