По официјализирањето на резултатите од страна на Државната изборна комисија и преземањето на градоначалничките функции парламентарниот состав ќе биде сменет со нови 5 пратеници.
Согласно законот на пратениците кои беа избрани за градоначалници Максим Димитриевски за Кумановo, Петре Шилегов за град Скопје, Коста Јаневски за Струмица, Сашо Поцков за Гевгелија и Стефан Богоев за Карпош им престанува функцијата.
На нивно место ќе седнат кандидатите за пратеници од СДСМ кои се следни на листите од парламентарните избори во декември 2016 година, односно Татјана Лалческа од Тетово, Анета Симеска Димоска од Македонски Брод, Лилјана Тасевска од Куманово, Ристе Ташев од Неготино и Костадин Костадинов од Струмица.
По завршувањето на вториот круг од локалните избори ќе се знае дали пратениците, кои се борат за градоначалнички позиции ќе останат во Собранието или ќе стапат на нова функција. Неизвесно е се уште дали Бетиане Китев за Кавадарци, Благој Бочварски за Штип, Курто Дудуш за Шуто Оризари, сите тројца од СДСМ , Јохан Тарчуловски за Кисела Вода од ВМРО-ДПМНЕ, Зијадин Села од ДР-ДПА за Струга, Зекирија Ибрахими од Беса за Чаир ќе станат градоначалници.
Претседателот на Собранието по завршувањето на изборите на првата седница што ќе ја свика ќе ги верификува мандатите на новите пратеници.
По изборите треба да бидат избрани и нови пратеници на местото Бардиљ Даути од ДПА и Биљал Касами од Беса кои уште пред првиот круг на локалните избори дадоа оставки од функциите.
Од друга страна, кандидатите за градоначалници Зоран Ѓорѓиевски за Куманово и Зоран Илиоски за Битола од ВМРО-ДПМНЕ, кои не победија на изборите, ќе останат пратеници во Собранието.
