Македонскиот напаѓач конечно се израдува на гол во дресот на Удинезе и при прославата си играше мајташ со ВАР откако претходно сезонава три голови му беа поништувани.
Илија Несторовски синоќа на гости кај Сампдорија го постигна првиот гол во Серија А во дресот на својот нов клуб, Удинезе.
Но, натпреварот не почна добро за него. Уште во третата минута со глава ја затресе домашната мрежа само за потоа голот да му биде поништен по реакција на ВАР. Несторовски за малку беше во недозволена позиција, доволно за ВАР по третпат сезонава да му поништи гол првично признат од главниот судија.
На неговиот малер конечно му дојде крај во 29-тата минута кога ни ВАР не можеше да му најде мана на неговиот гол. Илија Несторовски конечно се израдува на гол во дресот на клубот од Удине. При прослават на истиот, нашиот голгетер реши да си игра мајтап со ВАР и со рацете имитираше судија како покажува дека ќе оди да провери на монитор. Сето тоа проследено со гримаса. После три поништени голови, јасна е фрустрацијата на Илија.
Удинезе сепак го загуби натпреварот откако Сампдорија направи пресврт, но важно за нас е дека нашиот репрезентативец го скрши малерот наречен ВАР. Несторовски играше до 53-тата минута кога беше заменет со дефанзивецот Хиде тер Авест и поради црвениот картон на неговиот соиграч Мато Јајало.
