Аргентинскиот стратег конечно проговори за двајцата играчи на ПСЖ кои се незадоволни од статусот кој го имаат во клубот.
Дојде од Милан како засилување помеѓу стативите, но доби само клупа зад Костариканецот Кејлор Навас. Сигурно дека никој не очекуваше таков развој на настаните за Џанлуиџи Донарума, особено поради фактот што е број еден голман на актуелниот европски шампион Италија.
„Одигравме седум натпревари во еден месец, Кејлор Навас беше исклучен против Нант и беше суспендиран против Сент-Етјен. Тие одиграа по 5 односно 4 натпревари, така да им верувам и на двајцата“, коментираше Маурисио Почетино за ситуацијата со Донарума. Сепак, тоа не го менува очигледниот факт дека Џиџи е втор избор и брани само кога Навас не може или кога треба да се одмори.
Друг незадоволен во таборот на парижаните е Мауро Икарди, кој сезонава настапи на 14 натпревари во Лиг 1 искористувајќи ја ситуацијата со повредени напаѓачи. Но, веќе актуелни се низата шпекулации кои го носат во други клубови, особено во Јувентус.
„Не е вистински момент за да зборувам за трансфери, мораме да се фокусираме на тоа да ја завршиме годината на најдобар можен начин. Сепак, ние сме задоволни од него и се надеваме дека ќе остане“, рече Почетино.
