Тренерот на ПСЖ, Маурисио Почетино изрази оптимизам околу настапот на напаѓачот на францускиот првак Килјан Мбапе на реванш полуфиналниот натпревар од Лигата на шампиони против Манчестер Сити.
Мбапе, кој го повреди мускулот на десната нога пред првиот дуел против Сити минатата недела во Париз, го пропушти саботниот натпревар во француското првенство против Ленс (2:1), но стратегот на ПСЖ изрази надеж дека ќе може да смета на својот напаѓач за мечот во Манчестер.
– Секојдневно се проценува неговата состојба и мислам дека ќе може да игра, најави Почетино.
ПСЖ загуби минатата среда во Париз од Манчестер Сити со 2 : 1, а реваншот е на програмата утре со почеток од 21 часот.
Почетино ќе може да смета на речиси комплетниот тим, со исклучок на повредениот Хуан Бернат.
