Голманот на ракометната репрезентација на Португалија и екипата Порто, 32-годишниот Алфредо Кинтана, почина денеска како последица од срцев удар претрпен на почетокот на неделата. Докторите неколку дена се бореа за неговиот живот, но за жал не издржа срцето на младиот голман.
Информацијата за смртта на Кинтана ја потврди Порто на социјалните мрежи. Алфредо потекнува од Куба, а битката за живот ја изгуби пет дена откако доживеа инфаркт за време не тренинг.
„Нашиот најдраг Алфредо Кинтана почина денеска. Засекогаш ќе остане запаметен како еден од нас, вистински Змеј. Почивај во мир“, стои во соопштението на Порто.
Кинтана го бранеше голот на Порто од 2011 година и беше еден од клучните играчи за освојување на титулите во 2011, 2012, 2013, 2014, 2015 и 2019 година.
Зад себе остави сопруга и двегодишна ќерка.