Филм & ТВ

Почина HAL 9000 од култниот „2001: A Space Oddysey“

12. ноември 2018 - 18:13 | К.З.

Култниот научно-фантастичен филм „2001: A Space Oddysey“ на Стенли Кјубрик беше еден од првите филмови кои во улогата на антагонист наместо човек имаа робот – HAL 9000. Гласот кој стоеше зад HAL беше канадскиот актер Даглас Рејн, кој почина денеска на 90-годишна возраст.

Даглас Рејн почина денеска во неговата родна Канада. Последниот ден тој го помина во болницата во Онтарио, а докторите објавија дека починал од природна смрт.

Пред да започне снимањето на филмот, Кјубрик го одбрал Мартин Балсам за да го позајми гласот на HAL 9000, но се премислил во последен момент бидејќи Балсам имал „премногу американски акцент“. Кјубрик бил импресиониран од нарацијата на Рејн за канадската документарна серија „Universe“, за која режисерот тврди дека ја гледал преку 100 пати. Тогаш на сцената стапил Даглас Рејн, а останатото е историја.

Во 1967 година Рејн снимил преку девет и пол часови дијалог и монолози за ликот на HAL 9000, вклучувајќи 50 различни верзии на песната „Daisy Bell“ која роботот ја пее додека се појавува во неговата последна сцена.

Даглас Рејн е роден во Винипег во 1928 година. Тој доби стипендија за да студира актерство во 1950 година и оттогаш не погледна кон друга професија, иако на почетокот воопшто не му се допаѓаше наставата, најмногу поради тоа што мораше да студира во Англија. Тој се врати во Канада во 1953 година и оттогаш почна да работи како театарски актер и наратор.

Иако улогата на HAL 9000 му ја донесе најголемата слава во неговиот живот, тој сепак ниту еднаш не се појави во човечка улога во долгометражен филм. Сите негови филмски улоги беа сведени на нарација, но тоа не одзема ништо од неговата завидна актерска кариера.

Коментирај