Францускиот дизајнер и основач на модната куќа Givenchy, Ибер де Живанши, починал во саботата на 91-годишна возраст, а денеска веста ја потврди и неговото семејство.
Славниот моден гигант имаше кариера која траеше повеќе од пет децении, а помеѓу култните личности со кои тој соработуваше беа поранешната прва дама Џеки Кенеди (негова креација носеше на погребот на Џон Ф. Кенеди), како и актерската легенда Одри Хепберн, која беше негова муза и за неа создаде бројни креации.
Најзапамтени ќе останат креациите што Живанши ги направи за култниот филм „Breakfast at Tiffany’s“, меѓу кои славниот мал црн фустан.
„Тој е повеќе од дизајнер, тој е креатор на личности. Само во неговите креации се чувствувам како себеси“, изјави Одри Хепберн за Живанши.
Познат по неговата аристократска естетика, Живанши уживаше во популарноста во холивудските кругови во 20-от век, а сите, од Елизабет Тејлор до Грејс Кели ја признаваа неговата дизајнерска брилијантност.
По основањето на неговата модна куќа La Maison Givenchy во 1952 година, тој ја продаде на LVMH во 1988 година и остана да работи како главен консултант и шеф на одделот за креативен дизајн до 1995 година, кога се пензионираше.
