Ракунот Орео, кој е убедливо најпознатиот ракун во светот, почина викендов на 10-годишна возраст. Неговиот лик послужи како инспирација за ликот на Рокет од познатиот хит на Marvel, „Guardians of the Galaxy“.
Веста за неговата смрт беше објавена на фан-пејџот на „Guardians of the Galaxy“, набрзо откако семејството со кое живееше Орео ја соопшти тажната вест.
„Нашите срца се скршени бидејќи го изгубивме најдобриот пријател, нашиот ‘чувар на галаксијата’, ракунот Орео. Тој почина рано наутро откако не успеа да се избори со болеста. Им се заблагодаруваме на ветеринарите за нивната грижа и напор“, напиша Куинта Лејла.
Орео имаше многу необични искуства како за еден ракун, а еднаш ја доби шансата и да се прошета по црвениот тепих заедно со режисерот Џејмс Ган, за време на премиерата на „Guardians of the Galaxy“ во Холивуд. Тој, заедно со аниматорите кои ги снимаа неговите движења, го создаде ликот на Рокет – малиот вселенски ракун кој има проблеми со самоконтролата.
Ликот на Рокет беше креиран од страна на Бил Мантло и Кит Гифен за потребите на серијалот „Marvel Preview #7“ од 1976 година. Неговото име е инспирирано од песната на „Битлс“ со име „Rocky Racoon“. Тој за првпат се појави на филмското платно во 2014 година, а се очекува да се појави и во „Avengers: End Game“, кој излегува годинава.
