Режисерот Џонатан Дем, најпознат по филмот The Silence of the Lambs, почина на 73 години, соопшти неговата портпаролка во Њујорк.
Дем боледувал од рак, соопшти Анали Паоло.
„Џонатан почина денес наутро во својот стан на Менхетен, покрај својата сопруга Џоан Хауард и трите деца“, напиша Паоло.
Негов последен филм беше комедијата Ricky and The Flash од 2015 година, во кој Мерил Стрип глуми остарена рокерка.
Опусот на овој режисер вклучува разни жанрови, од комедии и трилери, до пионерски остварувања како со Оскар наградените Philadelphia, првиот филм во Холивуд што ја обработи темата за СИДА.
Дем режираше и музички документарци за ѕвездите како Брус Спрингстин, Kени Чесни, Нил Јанг и Токинг Хедс.
Њујорчанецот Дем освои Оскар за режија на својот дебитантски трилер The Silence of the Lambs од 1991 година, кој тогаш беше прогласен за најдобар филм. Ентони Хопкинс и Џоди Фостер за своите улоги исто добија Оскари.
Паоло напиша дека погребот ќе биде приватен и дека семејството побарало наместо испраќање цвеќе, да се уплатат донации за здружението Американци за имигрантска правда во Мајами на Флорида.
