Познатиот италијански композитор и оскаровец, Енио Мориконе почина денеска на 91-годишна возраст во болница во Рим. Тоа, како последица на минатонеделниот пад, објави неговиот пријател и адвокат Џорџо Асума.
Имено, пред неколку дена Мориконе паднал наземи и ја скршил бедрената коска.
Во моментот на неговата смрт, неговата сопруга Марија беше покрај него.
За време на својата повеќедецениска кариера, Мориконе твореше музика за филмовите „The Good, the Bad and the Ugly“, „For a Few Dollars More“, „Once Upon a Time in America“, „The Untouchables“, „Cinema Paradiso“, „Mission to Mars“ и многу други. А, беше и шест пати номиниран за престижниот Оскар во областа на филмската музика.
Мориконе е роден во Рим на 10 ноември 1928 година. Почнал како фудбалер во тимот на Рома каде сепак брзо се откажал за да го оствари својот музички сон. Иако се откажа од фудбалот, до крајот остана верен навивач на „Волчицата“. Последниот Оскар го доби во 2016 година за музиката за филмот „The Hateful Eight“ од Квентин Тарантино и тоа како најстар добитник во оваа категорија. Тој го освои и почесниот Оскар во 2007 година за неговиот значаен придонес во кинематографијата.