Култура

Почина Таска Балабанова – гласот на детството

21. ноември 2019 - 14:25 | А.С.

По долго и тешко боледување, почина Таска Балабанова, македонска филмска и телевизиска актерка, чии гласовни интерпретации на ликовите од цртаните филмови го одбележаа детството на многу генерации.

Балабанова, со чиј глас израснаа многу генерации слушатели на Радио Скопје, денес Македонско радио, почина во Скопје, на 85 години.

Родена е во Велес, во 1934 година. Актерската кариера ја започна во некогашниот Младинско-куклен театар, од кој во 1965 е формиран Драмскиот Театар. Таа потоа замина во Радио Скопје, каде до пензионирањето работеше како радио актер и го позајмуваше својот глас во бројни радио драми.

Незаборавна е нејзината интерпретација на ликот Олива од цртаната серија „Попај Морнарот“, како и надсинхронизациите во серијата „Штрумфови“.

Таска Балабанова учевствуваше и во снимањето на првите реклами во 50-те години на 20. век.

Играла во повеќе филмови и ТВ-серии, меѓу кои: Средба (1974), Едно лето (1982), Илинден (1982), Време на летала (1982),Трето доба (1987), Мугра (1989), Македонски народни приказни (1992), Време живот (1992).

Посмртните останки на Таска Балабанова ќе бидат изложени во капелата на градските гробишта во Бутел, во петок во 10 и 30 часот, а погребот ќе биде извршен во 11 и 30 часот.

Коментирај