Рип Торн, американски актер со кариера што активно траеше од 50-тите наваму, почина на 89 години, пренесува Guardian.
Неговиот публицист Рик Мирамонтез потврди дека Торн починал во својот дом, опкружен со семејството – сопругата Ејми Рајт и ќерките Кејти Торн и Анжелика Пејџ.
Култниот актер беше познат по исклучителниот талент, но и бурниот темперамент што понекогаш не можеше да го контролира. Ќе остане запаметена сцената од вистинскиот живот кога пред вклучени камери на снимањето на филмот „Maidstone“ го нападна режисерот Норман Мајлер и го удри со чекан по глава. Режисерот не му остана должен на Торн и му го гризна увото.
За публиката на овие простори Торн е најпрепознатлив по улогата во филмот „Men in Black“ од 1997 година.
Неговата изведба во „Cross Creek“ му донесе номинација за Оскар за најдобар актер во споредна улога. Ќе остане запаметен и по хумористичната серија „The Larry Sanders Show“.