Приливната турбина која се смета за најмоќна во светот, започна со работа и е поврзана со мрежата во Оркни, архипелаг на североисточниот брег на Шкотска.
Приливните турбини ја користат кинетичката енергија на океанските струења поради плимата, слично на ветерните турбини кои ја користат енергијата на ветерот. Приливните турбини имаат најдобар степен на корисно дејство при приливни струења помеѓу 4 и 5.5 mph.
Приливната турбина О2 на Orbital Marine Power е закотвена на локацијата Fall of Warness, каде подводен кабел ја поврзува оваа единица од 2 мегавати со копнената локална електрична мрежа.
Приливната турбина, позната и како плимна турбина, започна да работи или произведува „чиста енергија“ во време кога индустриските лидери бараат поддршка од владата за да ѝ помогнат на плимната индустрија комерцијално да се развива.
Оваа турбина може да обезбеди електрична енергија за 2.000 домаќинства годишно.
Голема турбина, направена да трае
Турбината има систем „ gullwing“ на преклопни делови што се движат како крилја на галеб, исто како вратата на легендарниот Mercedes SL 300. Овој подвижен систем е дизајниран за да може подводните делови на конструкцијата и пропелерите да се подигнат од морето со цел лесно одржување и можни поправки.
Секоја турбина има ротор со дијаметар од 20 метри кој може да ротира за целосни 360 степени. Ова ѝ дава на турбината комбинирана површина на роторот од 600 квадратни метри, најголема досега на која било приливна турбина.
Оваа иновација треба да ѝ овозможи на турбината да генерира енергија без потреба целата турбина да го смени правецот во зависност од појавата на плимата и осеката. Исто така, ќе овозможи безбедна, динамична контрола на роторите што ќе црпат енергија од различни насоки, без вртење на платформата.