Скопје, 28 септември 2018 (МИА) - Од полноќ започнува молкот за референдумот што ќе се одржи в недела на 30 септември. Денеска завршија сите активности на учесниците во кампањата.
Според Роковникот на ДИК молкот пред референдумот почнува 48 часа пред одржувањето на референдумот.
Агенцијата за аудио и аудиовизуелни медиумски услуги вчера извести дека кампањата „Твој став, твое право“ на Државната изборна комисија, како кампања од јавен интерес не спаѓа во јавната пропаганда за референдумот и може да се емитува и во петок и во сабота иако веќе ќе биде молк пред референдумот.
Според одлуката донесена од страна на Собранието на Република Македонија, прашањето за референдумот ќе гласи: „Дали сте за членство во ЕУ и НАТО, со прифаќање на договорот на Република Македонија и Република Грција?“
Референдумот ќе го надгледуваат околу десет илјади македонски и речиси 500 странски набљудувачи.
