Општина Центар распиша Јавен повик за доделување на поединечна субвенција на жителите на Општина Центар за купување нов велосипед, е-велосипед и е-тротинет во 2023 година.
„Придружи ни се! Качи се на точак за заштита на животната средина и помал метеж во сообраќајот“, порачува Општина Центар.
Јавниот повик веќе е отворен и ќе трае сѐ до исцрпување на средствата предвидени во Буџетот на Општина Центар.
Со Јавниот повик „Цел Центар на точак“, ќе се субвенционира 30% од цената за купување нов велосипед, е-велосипед и е-тротинет, но најмногу до 3.000 денари.
Секој полнолетен жител на Општина Центар што ќе купи нов велосипед, е-велосипед или е-тротинет, започнувајќи од 21 март, потребно е да ги достави следниве документи:
- барање за субвенција за купување на нов велосипед, е-велосипед и е-торитинет (достапно е во Архивата на Општина Центар (барака бр. 6) и на веб-страницата на Општина Центар centar.gov.mk.);
- копија од лична карта;
- копија од трансакциска сметка;
- фискална сметка во оригинал за купен нов велосипед, е-велосипед или е-тротинет.
Барањата со комплетна документација се доставуваат во архивата на Општина Центар, барака бр. 6, од 9:00 часот до 15:00 часот, почнувајќи од 21 март. По доставувањето на документите, подносителите ќе бидат известени за редниот број на поднесокот и субвенционирањето.
Правото на субвенција е еднократно.
За сите дополнителни информации, граѓаните можат да се обратат на телефонскиот број 02/ 3203-600 и 02/ 3203-693.
