Почна судењето на најмоќната мафија во Италија, со 900 сведоци кои ќе сведочат против 350 припадници и соработници на кланот Ндрангета, мафијашка криминална организација од југот на земјата. Меѓу обвинетите има и политичари и функционери.
Кланот има монопол на увоз на кокаин во Европа. Медиумите пренесуваат дека ова е најголемото судење на италијанска мафија во последните 30 години. Судењето се одвива во судница со капацитет за 1.000 присутни во градот Ламеција Терме во областа Калабрија. Поради коронавирусот, повеќето од обвинетите ќе го следат судењето преку видеолинк, а присутните во судницата ќе носат маски.
Во процесот има 58 заштитени сведоци, припадници на кланот, кои соработуваат со полицијата.
Ндрангета од 50-тите години на минатиот век се прошири на северот на земјата и по светот, а на почетокот на 21 век стана најмоќна организација од тој тип.
Судењето го води најпознатиот италијански обвинител за борба против мафијата Никола Гратери, кој три децении живее под полициска заштита. Од сведоците се очекува да ги разоткријат криминалните активности на највлијателното семејство на кланот и да го прекршат кодексот на молчење.
Кланот е обвинет за притисок на политичари, перење пари преку недвижнини, шверц на дрога, поседување приватни воени сили и друго. Повеќето од обвинетите, меѓу кои и поранешен сенатор, шеф на полиција, бизнисмени и функционери, се уапсени во текот на меѓународни рации во 2019 година во Италија, Швајцарија, Бугарија и Германија, поради трговија со дрога, лихварство, злоупотреба на положба, убиства, перење пари, обид за убиство и друго.