Во тек се последните подготовки за Канскиот филмски фестивал, кој почнува вечерва. Оваа година во борба за Златната палма ќе бидат 21 филм, а во отсуство на американските блокбастери на програмата доминираат филмови од Блискиот Исток и Азија.
Главниот постер на овогодинешниот фестивал е еден кадар од филмот „Pierrot le Fou“ на режисерот Жан-Лук Годард.
Фестивалот ќе го отвори филмот „Everybody Knows“ на наградуваниот режисер Асгара Фархадија. Овој психолошки трилер, каде во главните улоги се појавуваат Хавиер Бардем, Пенелопе Круз и Рикардо Дарин, ги следи семејните интриги и моралните дилеми на неколку жени чиј живот ќе се преврти наопаку откако ќе ја напуштат Аргентина и ќе заминат во Шпанија.
За Златната палма помеѓу останатите ќе се борат и Спајк Ли, Жан-Лук Годард и Павел Павликовски, а и оваа година фестивалот не изобилува со жени режисерки. Во конкуренција се најдоа филмовите на Французинката Ева Хусон, Либанката Надин Лабаки и Италијанката Алис Рорвахер.
Овогодинешниот фестивал носи и неколку нови правила. Оваа година е забрането сликање на селфи на црвениот тепих. Освен тоа, директорот на фестивалот во Кан, Тери Фремо, оваа година ги укина новинарските проекции на филмовите бидејќи сака критичарите, новинарите и публиката заедно да ги гледа филмовите и во исто време да го доживеат првиот впечаток за секој од филмовите.
На овогодинешниот Кански филмски фестивал за првпат ќе се натпреварува Саудиска Арабија, и тоа во категоријата посветена на краткометражни филмови.
Фестивалот оваа година ќе биде одржан во чувствителен период за филмската индустрија, поради неодамнешниот скандал со сексуално вознемирување кој ја раздрма целата филмска индустрија, посебно во САД. Со намера да придонесат за еднаквост во хиерархијата во Холивуд, голем број ѕвезди се приклучија кон движењето #MeToo, кое веројатно ќе го одбележи и овој фестивал.
Претседателка на жирито оваа година е австралиската актерка Кејт Бланшет, а меѓу членовите на жирито е и Леа Сејду, една од големиот број жени кои го обвинија Вајстин за сексуално вознемирување.