Новата сезона, а со самото тоа и новите возбудувања во рамките на највозбудливото европско фудбалско натпреварување, Лигата на шампионите, официјално ни почнуваат од утре.
Првото коло од групната фаза во ЛШ се игра утре и задутре и тоа во нови термини, од 18:55 и 21:00 часот.
Она што е најново е дека веќе нема да го имаме добро познатиот термин од 20:45 часот или дополнително воведениот од 18:00, кога се играа натпреварите на кои домаќини беа руски, украински и турски клубови.
Групната фаза ќе трае до 12 октомври, а во рамките на неа ќе се одиграат вкупно 96 натпревари. Веќе на првиот натпреварувачки ден,18 септември, ќе можеме да видиме неколку исклучително атрактивни дуели во групите А, Б и Ц.
Дерби натпревари кои не очекуваат оваа недела се дуелите помеѓу Интер и Тотенхем, утре од 18:55 часот во рамките на групата Б, како и дуелот помеѓу Ливерпул и ПСЖ, меч кој исто така се игра утре со почеток од 21 часот во рамките на групата Ц.
Но, доста интересно звучат и речиси сите преостанати натпревари од првиот натпреварувачки ден во рамките на ЛШ.
Имено, во групата А, клуб Бриж ќе ја пречека Борусија Дортмунд, а и вториот натпревар од оваа група е исто така атрактивен, Монако против Атлетико Мадрид.
Покрај истакнатото дерби, одлично изгледа и вториот меч од првото коло во групата Б, бидејќи шпанскиот гигант Барселона ќе го пречека холандскиот шампион ПСВ.
Во групата Ц, покрај споменатото дерби, ќе се одигра и уште еден интересен натпревар помеѓу Црвена Ѕвезда и Наполи.
Единствената група која уште од првиот ден, барем на хартија, не ни нуди некој интересен натпревар е групата Д, која и инаку звучи најмалку возбудливо.
