Македонија

Поднесено обвинение за убиството на 26-годишниот Пино

19. септември 2019 - 11:42 | МИА

Основното јавно обвинителство Скопје поднесе oбвинителен акт против едно лице за убиството на 26-годишниот Пинета Секондо – Пино во декември минатата година.

Надлежен јавен обвинител од скопското Основно јавно обвинителство до Основниот кривичен суд Скопје доставил обвинителен акт против едно лице за кривично дело  – убиство.

Како што е наведено во соопштението од Јавното обвинителство, на 11 декември 2018 година, обвинетата го повикала оштетениот, сега починатиот Пинета Секондо – Пино, и договорила да се сретнат на насипот во населбата Ѓорче Петров. Таму веќе бил пристигнат и другиот осомничен со возило „Опел Аскона“, носејќи со себе огнено оружје – пушка. Тој го оставил неговото возило на насипот и седнал да управува со автомобилот „Шкода“ со кое до насипот дошол оштетениот. На совозачкото место седнала обвинетата, додека убиениот седнал на задното седиште.

Тројцата, како што е наведено во соопштението, се упатиле по обиколница кон атарот на селото Арачиново и во една нива започнале најпрвин вербална расправија, а потоа и тепачка. Во еден момент осомничениот со пушката го застрелал во главата оштетениот Пинета Секондо.

Обвинетата дала особен придонес кон извршување на делото, така што овозможила да се сретнат, иако знаела за нивната меѓусебна нетрпеливост. Таа го повикала оштетениот, била присутна во моментот на неговото лишување од живот, а потоа заедно со другиот осомничен го ставиле телото на починатиот во багажникот на возилото. Заедно тие се упатиле кон гробиштата во селото Сингелиќ, а потоа се движеле низ планината кон Љуботен. На едно место здогледале дупка, па обвинетата и нејзиниот соизвршител го оставиле телото во дупката, покривајќи го со ќебе.

Надлежниот јавен обвинител до Судот достави и Посебен предлог за продолжување на претходно определената мерка притвор за обвинетото лице. Ваквиот предлог обвинителот го темели особено на опасноста обвинетата да се даде во бегство, соочена со кривична одговорност за тешко кривично дело, како што тоа го направил соизвршителот кој се уште е недостапен на органите на прогонот. Исто така, постои основан страв дека обвинетата би можела да ја попречува кривичната постапка, да ги сокрие, фалсификува или уништи трагите на кривичното дело, стои во соопштението од Јавното обвинителство. 

Коментирај