Дали Пол Погба бил блиску до одлука да го избере Реал Мадрид наместо Јунајтед?
Манчестер Јунајтед во летото 2016 година го направи Пол Погба тогаш да биде најскапиот фудбалер на сите времиња, а малку недостигаше тоа да го направи „Кралскиот клуб“.
Францускиот фудбалер во поткастот „Beyond the Pitch“, открива дека ја имал и таа опција на маса, но дека на крајот неговото срце одлучило повторно да ја избере старата љубов.
„Да бидам искрен, Реал Мадрид сакаше да ме доведе и размислував за трансфер таму, но истовремено размислував и за враќање во Манчестер Јунајтед. Од секогаш во своето срце го чувствував тоа и срцето ми кажа да се вратам на „Олд Трафорд“, порача момчето кое незадоволен од минутажата замина во Јувентус, каде за четири години забележа неверојатен напредок.
„Го избрав Јунајтед и не жалам, никогаш и нема“, јасно истакна Погба.
Пол за Јунајтед досега во првенството одигра 38 натпревари и постигна 8 погодоци, но игра многу променливо, од фантастични партии до „глупи потези“, а последниот таков го чинеше три натпревари суспензија и пропуштање на дербито на сезоната со Сити.
