Светскиот шампион Пол Погба не е навикнат да губи, а посебно не онака засрамувачки како што загуби викендов од Евертон. Поразот од 4:0 го натера Французинот да го истури гневот над неговите соиграчи, па се реши да упати остри критики и забелешки кон нив.
Тимот на Манчестер Јунајтед остава зад себе многу лош период, откако во една недела беше елиминиран од Лигата на шампионите и доживеа катастрофален пораз од 4:0 од Евертон во Премиер лигата.
„Лошо е да се изгуби натпревар, но најлошо е да се изгуби на таков начин. Навистина го почитувам Евертон, но начинот на кој игравме претставува непочит за дресот на Манчестер Јунајтед, бидејќи не се почитувавме ниту себеси, ниту навивачите, ниту клубот. Кога играте за овој клуб, тогаш веројатно сте го заслужиле тоа во кариерата, но морате да го почитувате дресот. Не сакам да бидам остар ама одредени играчи на Манчестер Јунајтед покажаа дека не се доволно добри за да го носат овој дрес“, рече Погба.
Не е познато на кого се однесуваше критиката од изјавата на Пол Погба, но освен него, уште неколку играчи значително потфрлија во натпреварот против Евертон. Ромелу Лукаку, Фред и Давид Де Геа имаа бледо издание во неделата, а Немања Матиќ дури се издвои себеси како главен виновник за поразот.
Следен натпревар за Манчестер Јунајтед е градското дерби против Манчестер Сити, кое доаѓа во многу незгоден момент за двата тима. Црвената страна на Манчестер се бори за пласман во Лигата на шампионите, додека сината страна на градот се надева на нова титула во домашното првенство и мора да победи на сите натпревари до крајот на сезоната доколку сака да ја обезбеди истата.
„Не знам како да се искупиме, но сигурен сум дека еден од начините е секогаш да го даваме максимумот на теренот, макар и да загубиме на крајот. Навивачите го ценат дресот и грбот на овој клуб, а ние сме должни да ја покажеме истата почит кон нив. Се извинувам поради очајната игра против Евертон, која не смееме да ја повториме никогаш повеќе“, истакна Погба.
Натпреварот помеѓу Манчестер Сити и Манчестер Јунајтед е на програмата утре (среда), со почеток од 21:00 часот.