Врховниот поглавица на племето Чероки побара од производителот на автомобили Jeep повеќе да не ја користи ознаката Cherokee на џиповите.
Jeep Grand Cherokee е бестселер на овој американски бренд, додека Jeep Cherokee е третиот најпродаван модел на брендот.
Американскиот производител неодамна претстави редизајнирана верзија на возилото Grand Cherokee, а компанијата продава теренци со името на индијанското племе веќе 45 години.
„Мислам дека дојде време и за корпорациите, и за екипите во тимски спортови во оваа земја да се повлечат од употребата на имињата на Индијанците, сликите и маскотите што ги користат за своите производи и спортски натпревари. Сигурен сум дека тоа што го прават е добронамерно од нивна страна, но ние не сме почестени што името на нашето племе е залепено на автомбил“, рече Чак Хоскин Џуниор, врховен поглавица на племето Чероки, во писмената изјава објавена во Car and Driver.
„Имињата на нашите автомобили беа внимателно избрани и користени со текот на годините за да ги почестат и величаат Индијанците за нивното благородништво, херојство и гордост“, рекоа од Jeep.
„Посветени сме, повеќе од кога било, на отворен и чесен дијалог со поглавицата Хоскин“, се вели во соопштението на американскиот производител на автомобили.
Од своја страна, Хоскин рече дека не гледа никаков договор што би бил прифатлив за него доколку Jeep продолжи да го користи името на племето на своите возила.
„Тоа е една од највредните работи. Тоа е дел од нашиот идентитет“, рече тој за CNN Business.
Car and Driver го покренаа ова прашање откако неколку други компании и спортски тимови објавија измени во нивните имиња и логоа кои ги искористуваат етничките стереотипи кога станува збор за Индијанците.
Минатото лето, Вашингтон Редскинс (црвенокожци) соопштија дека ќе се откажат од името и ќе викаат само фудбалски тим од Вашингтон. Неколку месеци подоцна, бејзбол тимот Кливленд Индијанс исто така објави дека ќе го смени името.
Jeep Cherokee првпат беше претставен во 1974 година, додека помодерниот изглед на Grand Cherokee се појави во 1993 година.
Моделот Cherokee го смени своето име во САД во 2001 година, но тоа име беше обновено во 2013 година на новата генерација на овој автомобил.