HBO Max денеска преку платформата YouTube го претстави првиот трејлер за продолжението на серијата „Gossip Girl“.
Девет години по завршувањето на снимањето на оригиналната серија, пристигнуваат нови епизоди кои ќе го следат животот на богатите деца од Апер Ист Сајд во Њујорк.
Во трејлерот, во кој доминира песната „Super Rich Kids“ на Френк Оушн, се појавува новата генерација на привилегирани потомци на богатите, со Џордан Александер која навидум потсетува на ликот на Блер од оригиналната серија.
Потоа, тука е постојаната закана од „Озборувачката“, која доби модерен живот во форма на профил на Instagram. Снимки од епски забави, модни ревии и тајни бакнежи го заокружуваат двоминутниот трејлер, гарантирајќи интриги дури и за најтврдокорните фанови на првиот дел.
Деталите досега беа чувани во тајност, а овој трејлер даде најголем увид во новите епизоди досега. HBO Max претходно само ги објави имињата на ликовите со кратки описи на Instagram.
Според најавата, се чини дека Џулиен Каловеј (Џордан Александер) е водач на групата, заедно со Ото „Оби“ Бергман IV (Илај Браун) како нејзино момче. Зоја Лот (Витни Пик) е новата девојка во градот.
Во серијата играат уште Томас Доерти, Тави Гевинсон, Емили Алин Линд, Еван Мок, Сион Морено и Савана Ли Смит. Продолжението ветува дека ќе истражи како се променија социјалните медиуми и њујоршкиот пејзаж по завршувањето на оригиналната серија во 2012 година.
Продолжението го разви Џошуа Сафран, кој беше сценарист и извршен продуцент на оригиналната серија.
Премиерата на новото продолжение на „Gossip Girl“ е закажана за 8 јули на HBO Max.