Американската вселенска агенција НАСА предупреди на неколку астероиди кои ќе поминат покрај Земјата во следните недели, а некои од нив се доста големи.
Само вчера најмалку четири астероиди поминаа покрај нашата планета.
Астероидот 2021 CX долг девет метри помина малку порано на безбедно растојание од 1,9 милиони километри, а по него следеа 2019 YP4, кој е долг 119 метри и со големина на Статуата на слободата, како и 2008 DB кој е долг осум метри. Првиот помина растојание од 3,1, а вториот 5 милиони километри од Земјата.
Во текот на вчерашниот ден, покрај Земјата помина и 2021 СЕ3 со дијаметар од 16 метри на растојание од 7,3 милиони километри.
Денеска се очекува астероидот 2021 CU1 со дијаметар од шест метри да помине на растојание од „само“ 605.113 километри. Колку за споредба, просечното растојание помеѓу Земјата и Месечината е околу 385.000 километри.
После тоа, пристигнува астероидот 2021 СО, долг 32 метри, кој ќе помине помеѓу нашата планета и Месечината на растојание од 345.885 километри и се движи со брзина од 41.000 км/ ч.
НАСА предупреди дека астероидот 2001 FO32, со големина на мостот Голден Гејт, долг меѓу 769 и 1.600 метри, ќе помине покрај Земјата во март на растојание помало од 2 милиони километри.