Сиднеј, 20 ноември 2018 (МИА) – Полицајци и војници упаднаа во Парламентот на Папуа Нова Гвинеја, во знак на протест поради неисплатените бонуси за нивната работа за време на Самитот на Организацијата за Азиско-пацифичка економска соработка (АПЕК), одржан изминатиот викенд.
Како што пренесува австралиската телевизија ABC, тие го блокираа патот што води до зградата на Парламентот во главниот град на Папуа Нова Гвинеја, Порт Морсби.
Полицајците и војниците се незадоволни бидејќи не им е исплатена ветената дополнителна заработка за време на меѓународната средба.
Како знак на револт кршеа прозорци, врати и мебел. Неколку пратеници изјавија дека се затвориле во своите канцеларии.
На меѓународната средба, што се одржа на 17 и 18 ноември, учествуваа шефовите на држави или на влади на Австралија, Брунеи, Виетнам, Индонезија, Канада, Кина, Малезија, Мексико, Нов Зеланд, Папуа Нова Гвинеја, Перу, Русија, Сингапур, САД, Тајланд, Филипини, Чиле, Јужна Кореја и Јапонија, како и претставници на раководствата на Хонг Конг и Тајван.