Колумбиската полиција затвори мал музеј во Меделин, кој го прикажуваше животот и делата на злогласниот шеф на нарко картел, Пабло Ескобар, бидејќи неговите сопственици немаат дозвола за вршење на такви активности, соопштија властите.
Соопштено е дека во музејот имало седум посетители, кога полицијата во средата изврши рација и го затвори музејот.
Музејот, со кого раководеше 71-годишниот брат на Ескобар, Роберто, беше популарна локација на таканаречената „нарко тура“ по Меделин.
Оваа контроверзна туристичка тура ги води посетителите на неколку места кои се поврзани со животот на Пабло Ескобар, меѓу кои се неговата гробница, затворот кој го изгради за себе и луксузната вила која ја бомбардираа неговите непријатели.
Градоначалникот на Меделин, Федерико Гутереш, вели дека таквите тури се легални, но дека не му се допаѓаат бидејќи промовираат „мафијашка култура“.
„Зошто да не зборуваме приказни за жртвите (од трговија на дрога) и да направиме нешто никогаш да не ги заборавиме, наместо луѓето кои предизвикаа толкава штета да ги прикажуваме како легенди“, изјави тој откако објави затворање на музејот.
Гутереш водеше кампања за промена на градската култура, а и од порано се изјаснуваше дека е против телевизиските серии кои се занимаваат со животот на шефовите на нарко картели од Меделин.
Тој од порано оваа година ги изнесе своите планови за рушење на напуштена зграда, која му припаѓаше на Ескобар, како и тоа да ја претвори во парк, кој ќе биде споменик за жртвите од колумбискиот картел, вклучувајќи и стотици полицајци убиени по наредба на Ескобар.