Телото на 24-годишниот хрватски фудбалер Јаков Јелкиќ, кој исчезна во Аликанте, Шпанија, ноќта на 1 февруари e пронајдено во понеделникот попладне во водите на градското пристаниште, објави порталот Información.
Телото е предадено на обдукција, но шпанската полиција верува дека се работи за несреќен случај.
Јаков, кој бил жител на швајцарскиот град Зермат, последен пат бил виден во ноќниот клуб „Upicum“, по што му се губи секаква трага.
Тој беше во Шпанија бидејќи неговиот фудбалски клуб Гранж-Пакот од Швајцарија играше натпревар во Аликанте.
Фудбалерите, во петокот вечерта, биле во споменатата дискотека „Upicum“, а откако ја напуштиле се упатиле кон хотелот. Јаков се вратил во дискотеката бидејќи ја заборавил јакната.
Швајцарските медиуми пишуваат дека пријателите сфатиле дека тој не е во својата соба во саботата наутро. Тоа им било сомнително, па го пријавиле за исчезнат. Полицијата во текот на истрагата успеала да го лоцира младиот човек на снимки од надзорните камери, на кои се гледа како сам оди кон областа Дихитал Дистрикт во пристаништето Аликанте. Токму на тоа место му бил прекинат сигналот од мобилниот телефон.
Следното утро полицијата го пронашла телото на Јаков на длабочина од околу 2 метра, на крајот од пристаништето.
Во вторник во Институтот за правна медицина во Аликанте ќе биде извршена обдукција за да се утврди дали е точна теоријата дека младиот човек починал од давење по несреќен пад.
