Репрезентацијата на Македонија не успеа да дојде до позитивен резултат во Варваша и на две кола пред крајот ги загуби шансите за пласман на ЕУРО 2020 преку квалификациите.
Видно ослабена откако поради повреда отпадна и Аријан Адеми, македонската репрезентација натпреварот со Полска го загуби токму на средината каде фалеше Адеми, но и Енис Барди кој воопшто и не беше во комбинација за октомвриските натпревари.
Без идеја како да се пренесе топката од одбраната во нападот, избраниците на селекторот Ангеловски 74 минути оддолеваа на полската репрезентација. Кобна беше таа 74-та минута кога штотуку влезениот Пжемислав Франковски при првиот допир со топката го совлада Димитриевски.
Само шест минути подоцна уште еден резервист ја потврди победата. Аркадиуш Милик упати одличен удар оставајќи го немоќен македонскиот голман.
По оваа победа Полска обезбеди пласман на ЕУРО, додека Македонија математички е во игра, но реално не е.
Покрај поразот во Варшава, не ни оди во прилог ниту пак резултатот од Љубљана каде Словенија загуби од Австрија со 0:1. Сега Австрија има 5 бода повеќе од нас, па макар и да ги победиме на гости наредниот месец потоа треба да се случи чудо бидејќи Австрија мора да загуби од Латвија за ние со победа и над Израел да бидеме втори. Чуда се случуваат, но реално Латвија е премногу слаба за да се надеваме на неа.
Македонија останува да ја чека шансата за пласман на ЕУРО во мартовските баражи каде има обезбедено место благодарение на настапите во Лигата на нации.
Табела:
1. Полска 19
2. Австрија 16
3. Македонија 11
4. Словенија 11
5. Израел 8
6. Латвија 0