Варшава сака да го седне Берлин на преговарачка маса за „конечна спогодба“ за последиците од агресијата на Адолф Хитлер.
Полскиот министер за надворешпни работи, Збигњев Рау, синоќа потпиша дипломатска нота до Германија во која се финализирани барањата за компензација за штетата претрпена од нацистичката инвазија и окупација за време на Втората светска војна
Варшава бара 1,2 илјади милијарди долари, но барањето веќе беше категорично одбиено од страна на Берлин.
Рау изјави дека двете држави треба да направат „итни чекори кон перманентен, сеопфатен и конечен правен и материјален договор во врска со последиците од германската агресија и окупација во 1939-1945“. Дополни и дека мерките би го затвориле болното историско минато и би помогнале да се подобрат билатералните односи.
„Ова е историски ден за цела Полска, сон на генерации Полјаци кои починаа со чувство на неправда“, рече Аркадиуш Миларчик, член на полскиот Парламент кој го предводеше тимот што минатиот месец објави извештај за загубите на Полска за време на војната.
Сејмот, долниот дом на полскиот Парламент, во септември изгласа побарување на 1,2 илјади милијарди долари репарација од Берлин. Портпаролот на полското МНР, Лукаш Јасина, изјави дека Рау ќе го покрене прашањето за време на средбата со неговата германска колешка Аналена Бербок за време на нејзината денешна посета на Варшава.
Германската Влада веќе ги одби најавите за репарација, аргументирајќи дека Варшава го решила правото за репарација во 1953 година кога потпишала договор со Источна Германија и дека тоа прашање е дефинитивно затворено со договорот за обединувањето на Германија од 1990 година, кој беше потпишан од Западна и Источна Германија, како и од САД, СССР, Обединетото Кралство и Франција.
Во меѓувреме, Полска инсистира дека договорот од 1953 година бил потпишан под притисок од Москва и дека не ѝ било дозволено да учествува при потпишувањето на оној во 1990.