По три натпревара без победа, кралскиот клуб синоќа славеше на гости кај Алевес, а од клупата командуваше помошникот на Зидан.
Откако поради позитивен тест на коронавирусот Зинедин Зидан мораше да замине во изолација во петокот, на кормилото на Реал Мадрид седна неговиот помошник, 49-годишниот Давид Бетони.
Мадриѓаните гостуваа во баскискиот град Виторија-Гастеис каде на „Мендизороца“ стадионот се сретнаа со Алавес, тим од долниот дел на табелата.
Уште по првите 45 минути гостите ја обезбедија победата која ја начнаа со голот на Каземиру во 15. минута, а токму пред паузата ја зголемија. Карим Бензема во 41. минута го дуплираше водството, додека Еден Азар во надополнувањето ги дотолчи домашните. Тони Крос аситираше на два од трите гола.
Алавес во 59-тата постигна гол преку Хоселу за искра на надеж, но единаесет минути подоцна Бензема со својот втор гол им ја запечати судбината.
Со оваа победа Реал ја прекина мини-кризата која траеше три натпревара, а почна со ремито без голови кај Осасуна. Продолжи со елиминацијата од Атлетик во полуфиналето од Суперкупот, а кулминираше со срамното испаѓање од Копа дел Реј од третлигашот Алкојано по продолженија.
Реал е втор на табелата во Ла Лига со 4 бодови помалку од Атлетико, но и два натпревара помалку.