Вашингтон, 15 септември 2019 (МИА) – Американскиот државен секретар Мајк Помпео синоќа го обвини Иран за нападите врз саудиските нафтени постројки, бидејќи ја исклучи вмешаноста на Јемен во нив. Притоа тој го обвини официјален Техеран дека се занимава со лажна дипломатија.
„Техеран стои зад речиси 100 напади врз Саудиска Арабија, додека Рохани и Зариф се претвараат дека се вклучени во дипломатијата“, напиша Помпео на својот Twitter профил.
И покрај сите повици за деескалација Иран сега почна напад без преседан на светското снабдување со енергија, додаде Помпео, не нудејќи докази за потеклото на нападот, пренесуваат британските медиуми.
Припадниците на јеменското племе Хути вчера ја презедоа одговорноста за нападите со дронови врз погоните на компанијата Saudi Aramco, соопшти воениот портпарол на Хутите.
Локалната телевизија al-Masirah, блиска до оваа бунтовничка група, јави дека Хутите употребиле 10 дронови за напади врз нафтените постројки и ветиле дека ќе ги прошират нападите врз Саудиска Арабија, која ја предводи коалицијата против нив во Јемен.
Саудиска Арабија претходно соопшти дека две нивни постројки биле нападнати од дронови, што предизвикале пожари, но не наведе кој стои зад нападот.