Универзитет во Брајтон организираше саем за бруцошите на кој на идните студенти освен информации за класичните катедри имаа прилика да дознаат сѐ што ги интересира за работата во секс-индустријата.
Универзитетот еден од штандовите на саемот го изнајмил на организацијата Sex Workers Outreach Project (SWOP) што во описот на дејност има ставено дека е дискретна и доверлива услужна организација за жени кои сакаат да работат во областа на проституцијата, а покрај информациите што им ги давале на младите жени, делеле и кондоми и лубриканти.
„Ако ги покривате трошоците за школувањето со проституирање или се мачите да ги вклопите работните со школските обврски, или ако само сакате да разговарате со некого, а не знаете кому да се обратите, ние сме тука за вас. Ги почитуваме вашата приватност и независност“, напиша организацијата на Twitter додека се одржуваше саемот за студенти.
Но, ваквиот потег на универзитетот не им се допадна на сите, а меѓу најгласните критичари беше писателката и феминистка Џули Биндел.
„Ова е во најмала рака срамота. Ме разгневува фактот дека трговијата со секс стана нешто сосема нормално и што им се пропагира на жените како безопасен и чесен начин да заработат за живот“, напиша таа на Twitter и многумина се согласија со неа.
Откако многу корисници на социјалните мрежи гневно реагираа, се огласи и самиот универзитет:
„SWOP беа дел од саемот со цел да се подигне свеста за поддршката што ја пружаат во случај некому да му притреба таква помош. Не дојдоа со цел да ја пропагираат проституцијата како опција за вработување. За жал, некои луѓе на погрешен начин го сфатија нивното појавување на саемот“, рече претседателот на студентскиот совет Том Ибукун.
Ваквото објаснување од универзитетот не ги смири страстите и не го избриша впечатокот дека на студентките им било нудено да работат како проститутки за да си го платат школувањето.
