Тренерот на Сан Антонио Спарс, Грег Попович, изјави дека неговиот тим ќе ја игнорира одлуката на државата Тексас за укинување на задолжителното носење маски, нарекувајќи ја одлуката на гувернерот Грег Абот „несериозна“.
Абот денес објави дека става крај на задолжителното носење маски во обид да се отвори Тексас „100%“, и покрај загриженоста на американскиот Центар за контрола на болести и спречување на нови случаи на коронавирус.
Говорејќи по победата на Сан Антонио со119 : 93 над Њујорк никс, Попович рече дека Спарс ќе продолжат да ги следат протоколите на НБА, според кои играчите, тренерите и судиите треба да носат маски.
„Што се однесува до играчите, ние ја слушаме НБА, а не гувернерот“, истакна Попович.
Тој го критикуваше Абот, велејќи дека се однесува како да заврши пандемијата, иако сите научници и експерти го тврдат спротивното.
„Дали еднаш претходно го поминавме ова и сега повторно ли? Ќе има нови случаи“, смета тренерот на Спарс.
Тексас е најголемата американска држава што ја укина одлуката за задолжително носење маски, а Абот, како што потсетува CNN, се соочи со критики од неговата партија поради изречената мерка во јули минатата година.
Во Тексас од почетокот на пандемијата, од COVID-19 починаа повеќе од 42.000 луѓе.