Најпрепознатливиот скутер на светот ќе добие електрична верзија во 2017 година. Паралелно со FIAT 500, Vespa одигра значајна улога во моторизацијата на поствоената Италија, а но и во многу други земји.
Иако се произведува цели седум децении, овој скутер денес ја нема истата улога како што ја имаше во минатото, а тоа пред се се должи на големиот број слични и поевтини превозни средства на две тркала.
Компанијата Piaggio која е производител на Vespa, планира повторно да ја нападне конкуренцијата така што ќе ги модернизира погонските системи на овој модел и ќе понуди верзија на струја. Италијанската компанија најави дека во моментот развива електричен мотор за Vespa која и покрај тоа ќе ги задржи одликите што некогаш ја направија популарна и успешна.
„Новата Vespa на струја ќе биде комбинација од атрактивниот дизајн, модерната технологија и еколошки прифатливо возило“ - вели компанијата во соопштението.
Vespa Elettrica ќе се појави на пазарот во втората половина на 2017 година.
