Британскиот Формула 1 возач Луис Хамилтон, според англиските медиуми, би можел да биде исфрлен од Големата награда на Велика Британија, која се вози в недела, и тоа поради малку бизарна причина.
Имено, Хамилтон влезе во отворена војна со Светската автомобилска федерација (ФИА) околу дозволата за носење накит за време на трките.
Одлуката на ФИА за забрана на секаков вид накит од безбедносни причини стапи во сила утрово и од следната трка ќе почне да се применува, пишува Daily Mail.
Оние кои ќе го прекршат правилото се соочуваат со висока финансиска казна, а во најлош случај и суспензија, што едноставно може да му се случи на Хамилтон.
Британецот наводно нема намера да го отстрани пирсот на носот, а на првата прес-конференција по донесувањето на новата одлука се појавил со неколку прстени и обетки.
Англичаните наведуваат дека сето тоа е дел од протестот поврзан со големиот расистички инцидент чија жртва беше тој.
Да потсетиме, трикратниот шампион во Формула 1, Нелсон Пике, расистички го навреди Хамилтон затоа што во еден бразилски подкаст двапати во последователни реченици го нарече neguinho (негињу), што буквално значи „мал црнец“ или „црнче“.