Македонската фудбалската репрезентација ќе мора на мегдан во Грузија да оди без Иван Тричковски и Кире Ристевски кои денеска дефинитивно отпаднаа од комбинација.
Напаѓачот Тричковски беше повреден и поради тоа не беше во комбинација за вчерашниот дуел со Ерменија, но имаше надеж дека ќе може да биде во тимот за гостувањето кај Грузија во вторник. Сепак, хематомот на левата надколеница сѐ уште му прави проблем и дефинитивно отпадна од комбинација.
Тричковски се надеваше дека месецот ќе го забележи 57. настап со што на вечната листа на играчи со најмногу настапи во репрезентацијата ќе го мине Ванче Шиков со кој моментално го дели 8. место.
Отпадна и десниот бек Кире Ристевски кој заработи повреда на натпреварот со Ерменија. Тој има истегнување и хематом на адукторот на десниот бут поради кој Ангеловски ќе бара друго решение на неговата позиција. Синоќа кога Ристевски беше заменет назад се повлече Езџан Алиоски кој порано беше латерален бек пред да биде прекомандуван во офанзивата.
Македонија игра со Грузија во вторник од 18 часот во Тбилиси.