Германскиот фудбалски второлигаш Нирнберг нема да игра натпревари во вечерен термин, откако Градскиот совет во услови на енергетска криза одлучи да ѝ го ограничи на екипата користењето на рефлекторите на стадионот „Макс Морлок“.
Руската инвазија врз Украина, која почна на 24 февруари, доведе до раст на цената на електричната енергија во целиот свет, а Германија, како голем зависник од руските енергенси, со наближувањето на зимата настојува да ја намали потрошувачката на гас и струја.
– Зимава би можело да има недостиг од гас и струја. Поради тоа Градскиот совет повторно расправаше околу тоа каде можеме да штедиме енергија, соопштија градските власти во Нирнберг, дадавајќи дека е донесена одлука за ограничување на користењето рефлектори и подземното греење на стадионот „Макс Морлок“.
– Греењето на стадионот ќе остане исклучено по договорот со Фудбалската федерација на Германија, а го ограничуваме користењето рефлектори до максимум 21 часот навечер, се додава во соопштението.
Одлуката на Градскиот совет значи дека поранешниот бундеслигаш нема да може да организира вечерни натпревари кои почнуваат во 20:30 часот.
Стадионот кој е со капацвитет од 50.000 седишта од јули 2017 година го носи името на легендарниот германски напаѓач Макс Морлок кој целата кариера ја мина во дресот на Нирнберг, а беше еден од главните играчи во златната генерација на Западна Германија која го освои Мундијалот 1954 кога на изненадување на сите во финалето со 3:2 ја совлада непобедливата Унгарија на Ференц Пушкаш.