Поранешниот руски претседател и актуелен заменик-шеф на рускиот Совет за безбедност, Дмитриј Медведев, испрати пораки откако американскиот претседател Џо Бајден одобри употреба на американско оружје за напади длабоко во Русија.
Набрзо потоа, рускиот претседател Владимир Путин одобри ажурирана верзија на нуклеарната доктрина.
„Откако малку се спушти прашината што ја кренаа западните медиуми, очигледно е дека и покрај очигледната пропагандна намера на публикациите, ова што се случува може да има многу сериозни последици“, рече Медведев и додаде:
„Не е толку важно кој и кога ја донел одлуката за употреба на тактички балистички и крстаречки ракети со долг дострел на земјите од НАТО ‘длабоко на територијата’ на Русија. Згора на тоа, веќе имало обиди за нивна употреба кај нас. Не е толку важно колку од нив има непријателот денес и дека нивната употреба, според мислењето на нашите непријатели, треба да има не само воен, туку и информативен ефект“.
Тој наведува и дека „не е толку важно со ваквите одлуки актуелната американска администрација намерно да создава таква ескалација на конфликтот со кој ќе треба да се справи тимот на Трамп“.
„Едно е важно - што рече шефот на руската држава на 12 септември. Како резултат на тоа, денеска беше одобрена нова верзија на Основите на државната политика во областа на нуклеарното одвраќање. Употребата на ракетите на алијансата на овој начин може сега да се оквалификува како напад на земјите од блокот врз Русија. Во овој случај, произлегува правото да се одмазди со оружје за масовно уништување против Киев и големите инсталации на НАТО, каде и да се наоѓаат. И ова е веќе трета светска војна. Можеби стариот Бајден навистина решил грациозно да умре, земајќи значаен дел од човештвото со себе“, напиша тој преку мрежата Телеграм.
