Поранешниот директор на ЦИА, Џон Бренан, смета дека Русија веројатно има „нешто што ја инкриминира“ во врска со Трамп, што го објаснува неговиот необично мек став кон Путин.
„Велам дека Русите можеби имаат нешто и дека затоа Трамп е загрижен“, изјави Бренан и додаде дека ако има нешто такво „Трамп сигурно најдобро од сите го знае тоа“.
Бренан беше на чело на ЦИА за време на вториот мандат на поранешниот американски претседател Барак Обама, кога американската известувачка служба откри документи во кои се тврди дека рускиот претседател Владимир Путин влијаел на претседателските избори во САД, со цел за победа на Доналд Трамп.
За потсетување, Трамп беше критикуван од домашната јавност поради тоа што му го честиташе реизборот на Путин, во момент кога во Америка се води истрага околу евентуална вмешаност на Русија во неговата победа и врските на изборниот штаб на Трамп со официјална Москва.
Трамп се бранеше со зборовите дека и неговиот претходник, Барак Обама, му честитал на Путин, кога тој победи на претходните избори.
Меѓутоа, Бренан вели дека е тешко да се објаснат потезите на Трамп кога станува збор за Путин.
